29 Gusht 2022

“… kundër Martinajt janë bërë bashkë 7 banda, ish-ortakë të tij në biznes që krijuan një strukturë të ngjashme me “Los Pepes” në Kolumbi”.

Gazetari Artan Hoxha ka zbuluar ditën e sotme detaje nga jeta e Ervis Martinajt.

Bëjmë me dije se ky i fundit është në kërkim nga autoritetet për disa vepra të rënda penale, teksa disa ditë më parë familjarët e tij konfirmuan se kanë humbur çdo lloj kontakti me të, duke rritur dyshimet se kundërshtarët e tij mund ta kenë vrarë.

Hoxha në media është shprehur se Martinaj kishte blerë dy vila përballë banesës së Edi Ramës në Surrel, teksa rrëfen dhe batutën që ka bërë me vet të shumkërkuarin.

 “Martinaj ka katër fëmijë, tre vajza dhe një djalë dhe duke qenë se i ka në një shkollë në atë zonë ka blerë dy vila përballë shtëpisë së kryeministrit në Surrel. Me sa kam informacion unë ai kishte bërë përpjekje të blinte edhe tokë në atë zonë. Unë madje kam folur me punonjës të gardës, madje ia kam thënë edhe Ervis Martinajt. Sepse ai lëvizte me eskortë. Ajo rruga është e ngushtë, ti me eskortë, ai me eskortë, do përplaseni” i kam thënë. Fakti që shkoi aty, mu përballë u mor si një farë sfide” tha Hoxha, duke iu referuar kryeministrit Rama.

Sipas Hoxhës, shkak për zhdukjen e Martinajt është kapja e tregut të kumarit, pasi ai nuk lejonte futjen e askujt tjetër në këtë treg. Sipas Hoxhës, kundër Martinajt janë bërë bashkë 7 banda, ish-ortakë të tij në biznes që krijuan një strukturë të ngjashme me “Los Pepes” në Kolumbi.

Gazeta Shqip